Alaqawa zonê dayike û kamîye

DAİMİ DOĞAN

Înson kotî ke amo dîna thamê o ca dano.

Kamîya qomû de cayê zonê dayike zaf berz o. Ocaxê korrû na sevet ra, qomê nêçarû rê ravêr zonê dayike kerdo tomete. Înû rind zanito ke qomî ebe zonî yenê werte û ebe zonî name bênê. Jû qom ke bêzon verd, weşîya xo dest ra sona, beno lal û kherr. Ebe na qeyde kamîya xo kî darîna we. Na sevet ra hîris û heşt ra hata nika, Dersîmijû rê kamîye kerda tomete. Hîris û heşt ra dima, tayê khalikû û pîrîkûnê ma nêtorê ke zonê xo û rawa xo domonûnê xo rê salix biderê. Çike înû fam kerdo ke serva rawa xo û kamîya xo qirr bîyê. Na ters ver, zagonê xo jêderî domonûnê xo rê nêmusno. Qe nêbo, azê-uzê ma nê sevetû ra qirr mebê, beno ke ebe tirkî weşîya xo ramenê vato.

Zagonê qomû de sifte zonê qomû esto. Zonê qomû tomete kerdene, zagonê qomû û îtiqatê qomû kiştena. Guman çîn o ke zonê dayika ma ke na hal der o, no jêde sucê hukmatin o. Hama pêro suc înû rê bar kerdene kî raştiye nêvatena. Çike kes bese nêkeno ke qarsê zerê çê ma bo. Zon, sifte marîfetê zerê çêyî ra musîno. Ewro ma û pî ke zerê çêyî de zonê xo qesey nêkerd, helvet domonî kî nêmusenê. Ma ke zerê çê xo de, arevê xo de kilamî bîla zonê xo de gos nêdayî, sanikî zonê maye ra nêvatî, hêkatî zonê maye ra qesey nêkerdî, henî zanen ke no kî sucê kesî nîyo. Domonê nikayî wertê xo de milqî bîla endî kirmanckî ke nêkenê, gereke ma kî sifte verê çêverê xo gez bikerîme.

Înson, bê zonê dayike rew bo herey bo beno werdê vergê yavanû. Eke bizanîme kirmanckî, ma rê jê non û awe wo. Çitur ke bê non-awe weşîye nêramîna, bê zon kî nêramîna. Gereke her ca de zonê mawa xo qesey bikerîme. Xatir gormaxîya xo, zonê xo ra bivirajîme. Meyîtûnê xo, zonê xo ra wedarîme. Silayîya xo, veyveyûnê xo, axsata xo zonê xo ra bivirajîme. Kemerê mezelûnê xo, zonê xo ra binusnîme. Zonê xo ra sa bîme, bihuyîme. Domonûnê xo rê, zonê xo de namewû piranîme. Rozşênûnê xo, zonê mawa xo ra bimbarek bikerîme.

Weşîya qomû de cayê edebîyat, huner, şîîr, muzik, tiyatro ûêb. zaf berz ê. Guman çîn o ke nê pêro zonê maye ra virajînê û pêro-pîya weşîya qomû anê ra zon. Helvet weşîya qomû kî kamîya qomû nana ro. Dewletê xezevtulawû her waxt, waşto ke qomê bînî ebe zonê înû ra bifikirîyê. Çike zonê maye ke werte ra da we, qom kî bêperr û bê rêçe maneno û kamîya xo darina we.

Heqa zonê maye pêro dîna de heqa însonetî ya. Dina de kamî dewletû ke  na heqe kerda tomete, gereke xora bisermayîyê. Serva zorbajêna xo ef biwazê, raştîya xo de bêrê têrî. Hama endi ma kî gereke weşîya xo qe nêbo wertê xo de, çêyê xo de zonê xo ra biramîme. Teyna gere mekerîme!